تحدثنا فى السابق عن الامراض الروماتيزمية المناعيه فى الاطفال فى مقال سابق
ايه الفرق بين امراض الإلتهاب الذاتي وبين الامراض المناعية؟
لو الأنسجة اللي في جسمي اتصابت بأي مشكلة زي مثلا ميكروب بيهاجمها، او خلل مناعي متسبب في ان جهاز المناعة بتاعي بيهاجمها، او تعرضت لحرق، او خبطة جامدة جدا، كل الحاجات دي بتؤدي الى ان النسيج اللي في جسمي يرد على هذه الاستفزازات المختلفة ويعلن حالة الطوارىء، اللي هي بلغة الطب اسمها، يضغط على زر الإلتهاب .. يعني يحصل التهاب..الإلتهاب ده بقى رغم اعراضه المزعجة من الم وربما تورم مثلا في هذا النسيج المصاب، إلا ان هدفه في الآخر احتواء الموقف والتعامل مع السبب في المشكلة ورجوع كل حاجة الى طبيعتها مرة أخرى في الآخر.
في الأمراض الالتهابية بقى اللي هي موضوعنا بيحصل ان الخلل اللي في جسمنا انه، من غير ما يكون فيه أي محفز للإلتهاب أصلا، يعني من غير ميكروب او خلل مناعي او حرق الخ، الخلل بيكون ان الجسم من غير مناسبة ضغط من نفسه على زر حالة الطوراىء، زر حالة الإلتهاب، ويحصل بقى التهاب عنيف في الجسم منطلق ومفيش حاجة عارفة توقفه. هو ده اللي بيحصل في عائلة الامراض الإلتهابية.
بالإنجليزي اسمها
Auto-inflammatory Syndromes
والعائلة دي بتتضمن امراض شهيرة زي حمى البحر المتوسط ومرض اسمه ستيلز ومرض اسمه كاواساكي بيصنف مناعي وبيصنف التهابي احيانا، ومرض اخير عبارة عن حالة التهاب عامة بالجسم بتحصل مع بعض حالات الكوفيد (الكورونا) في الاطفال
Post COVID Multisystem Inflammatory Syndrome in Children
سوف نتحدث بالاخص عن مرضين مهمين
المرض الاول هو حمى البحر المتوسط أو Familial Mediterranean Fever
FMF
وده مرض مش نادر بالمرة، بتحصل فيه هجمات متكررة من ألم إما في البطن او الصدر او مفصل واحد مثلا مع ارتفاع في درجة الحرارة. الهجمة الواحدة بتحصل لمدة تلات ايام ويخف الألم فترة ويرجع تاني بعد كده بعد اسابيع او اكتر وهكذا.
المرض التاني هو مرض ستيلز، واسم ستيلز ده في الحقيقة لم يتم تداولة في الاوساط العلمية وكان بيصنف قبل كده على انه نوع من انواع روماتويد الاطفال المناعي والمرض ده حاليا اسمه بالإنجليزي
Systemic Onset Juvenile Idiopathic Arthritis
Systemic Onset JIA
وفي المرض ده بيحصل ارتفاعات متكررة في درجة الحرارة مع التهاب بالمفاصل وممكن كمان طفح جلدي في بعض المرضى وتضخم في الغدد الليمفاوية. والمرضى دول بيكون عندهم علامات الإلتهاب زي سرعة الترسيب مثلا مرتفعة جدا وبيكون عندهم ارتفاع في عد كرات الدم البيضاء بشكل ملحوظ جدا.
------------------------------
قام بإعداد وتقديم هذه المعلومات الأستاذ الدكتور حاتم العيشي، استاذ الامراض الروماتيزمية بكلية الطب بجامعة القاهرة واستشاري الروماتيزم بجمهورية مصر العربية والمملكة العربية السعودية
الدكتور حاتم العيشي يهتم كثيرا بتثقيف مرضى الروماتيزم (اصطلاح مجازي يقصد به مرضى الامراض الروماتيزمية) ويدير عيادة روماتيزم بالقاهرة وايضا يدير مركز يقدم استشارات طبية اون لاين والذي يقدم، بالاضافة لخدمة استشارات طبية في مجال الروماتيزم، استشارات طبية في مجالات طبية اخرى عديدة على ايدي مجموعة من الاطباء الاستشاريين في مصر وكندا والولايات المتحدة
----------------------------
اذا كنت ترغب في الحصول على روابط المحاضرات الجديدة لدكتور حاتم العيشي عن الامراض الروماتيزمية على الواتس اب، برجاء الضغط على هذا الرابط
----------------------------
للاطلاع على مكتبة الفيديو الخاصة بفيدوهات د. حاتم العيشي على اليوتيوب للمرضى، برجاء الضغط على هذا الرابط
----------------------------
لمشاهدة فيديوهات د. حاتم العيشي للمرضى باللغة العربية، برجاء التوجه لقناته على هذا الرابط
----------------------------
اذا كنت تود الحصول على استشارة اون لاين فيديو مع د. حاتم العيشي، برجاء الضغط على هذا الرابط