ما هي اهم اعراض مرض التهاب المفاصل المتعدد في الاطفال؟
اتفقنا فى السابق ان مرض بولي جي اي إيه او مرض التهاب المفاصل المناعي المتعدد في الاطفال بيحدث بنسبة اعلى في سن سنتين الى خمسة سنوات او في سن فوق العشر سنوات وحتى اربعة عشر سنة.
اعراض مرض بولي جي أي إيه:
أعراض المرض في الاطفال الاصغر سنا: لما ييجي المرض للأطفال اللي في المرحلة العمرية الاصغر اللي هي تحت عشر سنين، بيبدأ عادة بشكل ضعيف وبسيط خالص في الاول، يعني رغم انه مرض المفروض بيصيب عدد من المفاصل زي ما اتفقنا، خمسة واكتر، إلا انه ممكن يبدأ في مفصل واحد او اتنين
ومش بيكون في البداية عنيف ولا أعراضه شديدة لدرجة ان الاهل مش بيعتبروا ان في مشكلة اصلا تستدعي استشارة طبيب، لحد ما فجأة والفجأة دي مثلا ممكن تيجي بعد دور برد عابر او أي التهاب ميكروبي عابر، يحصل معاه او بعديه على طول تغيير كبير في الاعراض وتلاقي عدد من المفاصل فعلا التهب وبشدة. طبعا لأن الاعراض الاولانية البسيطة خالص اللي بيتجي في مفصل واحد ولا اتنين وبتكون بسيطة، بتكون عدت من غير ما حد يلاحظها ويحطها في الاعتبار في معظم الاوقات، لما بييجي الإلتهاب العنيف الفجأة ده بيكون هو ده الوقت اللي الاهل عادة بيعتبروا ان المرض بدأ فيه، مش قبلها.
عندما يصيب الأطفال الاكبر من سن عشر سنوات، فالمرض في السن ده بيكون واضح وصريح من البداية.. بيبدأ في عدد من المفاصل وبيبدأ بشدة وعنف وأعراض الألم فيه بتكون اشد واعنف من علامات الإلتهاب اللي في المفاصل.. يعني ممكن يكون بالكشف علامات الإلتهاب من تورم مثلا مش شديدة اوي لكن الالم هو اللي بيكون شديد.
اهم العلامات اللي بنلاقيها في الكشف بصفة عامة في هذا المرض سواء اللي بيجي في الاطفال الاصغر او الاكبر في السن بتكون طبعا علامات التهاب المفاصل من تورم والم عند الضغط على المفاصل والم مع مجال الحركة بتاع المفاصل، ده غير طبعا ان الطفل هيكون بيعرج لو فيه تأثر في مفاصل الساقين.
------------------------------
قام بإعداد وتقديم هذه المعلومات الأستاذ الدكتور حاتم العيشي، استاذ الامراض الروماتيزمية بكلية الطب بجامعة القاهرة واستشاري الروماتيزم بجمهورية مصر العربية والمملكة العربية السعودية
الدكتور حاتم العيشي يهتم كثيرا بتثقيف مرضى الروماتيزم (اصطلاح مجازي يقصد به مرضى الامراض الروماتيزمية) ويدير عيادة روماتيزم بالقاهرة وايضا يدير مركز يقدم استشارات طبية اون لاين والذي يقدم، بالاضافة لخدمة استشارات طبية في مجال الروماتيزم، استشارات طبية في مجالات طبية اخرى عديدة على ايدي مجموعة من الاطباء الاستشاريين في مصر وكندا والولايات المتحدة
----------------------------
اذا كنت ترغب في الحصول على روابط المحاضرات الجديدة لدكتور حاتم العيشي عن الامراض الروماتيزمية على الواتس اب، برجاء الضغط على هذا الرابط
----------------------------
للاطلاع على مكتبة الفيديو الخاصة بفيدوهات د. حاتم العيشي على اليوتيوب للمرضى، برجاء الضغط على هذا الرابط
----------------------------
لمشاهدة فيديوهات د. حاتم العيشي للمرضى باللغة العربية، برجاء التوجه لقناته على هذا الرابط
----------------------------
اذا كنت تود الحصول على استشارة اون لاين فيديو مع د. حاتم العيشي، برجاء الضغط على هذا الرابط