بصفة عامة مرضى الامراض الروماتيزمية المناعية بيكونوا اكثر عرضة للإصابة بالالتهابات الميكروبية بعد العمليات الجراحية بسبب المرض ونشاطه من ناحية وبسبب استخدام الادوية المثبطة للمناعة من ناحية تانية
بالنسبة لجزئية المرض ونشاطه بنحاول نتحكم في المرض قدر المستطاع قبل ما نروح نعمل جراحة.
بالنسبة لتأثير الأدوية المثبطة للمناعة اللي بنستخدمها في علاج المرض، بنعمل تعديلات في جرعات بعض هذه الأدوية قبل العمليات الجراحية زي ما هنشرح في الفيديو ده.
توقيف الادوية وخلاص قبل العملية الجراحية مش حل مثالي اوي زي ما البعض ممكن يكونوا فاهمين، احنا محتاجين نحافظ على التوازن بين فرصة حدوث التهاب ميكروبي او فرصة تأخر بإلتئام جرح العملية لو الادوية استمرت عادي من غير ما نوقفها من ناحية وحدوث نشاط للمرض لو الأدوية اتوقفت عن المريض خالص ولمدة طويلة
الادوية الآمنة اللي مش لازم يتم توقفيها خالص واللي بنكملها عادي خالص لو المريض هيعمل جراحة هي
البلاكونيل والسلازوبيرين والميثوتريكسات والارافا او الافارا او الارث فري او الليفورا
بالنسبة لإستخدام الأدوية البيولوجية وعلاقتها بحدوث التهابات ميكروبية، الملاحظات المسجلة من متابعات لأعداد كبيرة من المرضى اشارت الى ان فرصة حدوث التهابات ميكروبية في المرضى اللي كانوا بياخدوا علاج بيولوجي ومستمرين عليه وقت الجراحة كانت بتحصل على الأخص في المرضى اللي بتاخد العلاج البيولوجي بقى لها اسابيع قليلة جدا ولكن مش في المرضى اللي كانوا مستمرين عليه من فترات اطول من كده، شهور مثلا، وده ممكن يعكس ان المرض النشط اللي لسه مش تحت السيطرة كان هو اللي بيقلل المناعة اكتر ويتسبب في الاتهابات الميكروبية اكتر حتى من العلاج البيولوجي.
إلا إننا في الآخر شغالين بتوصيات تم الإتفاق عليها بخصوص استخدام العلاجات البيولوجية المختلفة في المرضى اللي هيعملوا جراحة، والكلام هنا لما نقول جراحة بنتكلم زي ما اتفقنا على عمليات جراحية كبيرة زي تغيير المفاصل وليس عمليات صغيرة زي خلع ضرس مثلا.
هنعرض هنا لكل عقار بيولوجي، المفروض يتم ايقافه قبل الجراحة بأد إيه والمفروض نرجعه بعدها بأد إيه:
هيوميرا أو أمجيفيتا: اللي المفروض بناخده كل اسبوعين: نوقف جرعة كان عليها الدور ونعمل الجراحة بعد معاد الجرعة اللي وقفناها دي باسبوع واحد يعني تلات اسابيع من معاد آخر جرعة أخدناها.
انبريل: اللي المفروض بناخده كل اسبوع: نوقف جرعة كان عليها الدور ونعمل الجراحة بعد معاد الجرعة اللي وقفناها دي باسبوع واحد يعني اسبوعين من معاد آخر جرعة أخدناها.
سيمبوني او اكتيمرا اللي في الوريد او ارونشيا اللي في الوريد: اللي المفروض بناخدهم كل اربع اسابيع: نوقف جرعة كان عليها الدور ونعمل الجراحة بعد معاد الجرعة اللي وقفناها دي بأسبوع يعني بعد خمس اسابيع من آخر جرعة أخدناها.
مابثيرا: اللي المفروض بناخده كل ست شهور: نوقف جرعة كان عليها الدور ونعمل الجراحة بعد معاد الجرعة اللي وقفناها دي بشهر يعني بعد سبع شهور من آخر جرعة أخدناها.
زيلجانز: اللي المفروض بناخده كل يوم حبتين: نوقف جرعة كان عليها الدور ونعمل الجراحة بعد معاد الجرعة اللي وقفناها دي باسبوع واحد
بإتباع الجداول دي احنا كده بنضمن اننا نوقف العقار البيولوجي اقل فترة ممكنة عن المريض.
العقار البيولوجي بنرجعه تاني اول ما نطمن ان الجرح بتاع العملية بيلتئم بدون اي مضاعفات والغرز كمان اتشالت والموضوع ده بياخد حوالي اسبوعين على الاقل.
بالنسبة للكورتيزون:
استخدام الكورتيزون قبل ووقت العمليات الجراحية الكبيرة بالذات عمليات تغيير المفاصل ممكن يؤدي إلى فرصة اعلى لحدوث الإلتهابات الميكروبية وكمان ممكن يؤثر على سرعة التئام الجرح بتاع العملية. والمضاعفات دي لها علاقة مباشرة مع جرعة الكورتيزون: كل ما زادت الجرعة كل ما زادت الفرصة.
الكورتيزون له علاقة بالمشاكل دي اكتر من اي ادوية تانية بتستخدم لعلاج الامراض الروماتيزمية بما في ذلك حتى الادوية البيولوجية.
ايه الإحتياطات اللي بنعملها فيما يخص الكورتيزون: الحاجة المتفق عليها هي اننا بنحاول قد المستطاع، نقلل جرعة الكورتيزون قبل الجراحة لأقل جرعة ممكنة وبالذات جدا بقى لو مريض بيتعاطى جرعة كورتيزون اعلى من عشرين ميليجرام قبل الجراحة، بنحاول على أد ما نقدر اننا نقللها إلى اقل من العشرين ميليجرام بأي طريقة لو قدرنا.
دي كانت قائمة بكل انواع التعاملات مع العلاجات المختلفة في مرضى الروماتويد اللي هيعملوا جراحة.. لكن تذكر ان كل حاجة لازم تتم من خلال طبيبك خاصة وإن الإعداد لجراحة بيتضمن مجموعة من الإحتياطات، وتعديلات الأدوية دي نقطة واحدة فقط منهم.
-----------------------------
قام بإعداد وتقديم هذه المعلومات الأستاذ الدكتور حاتم العيشي، استاذ الامراض الروماتيزمية بكلية الطب بجامعة القاهرة واستشاري الروماتيزم بجمهورية مصر العربية والمملكة العربية السعودية
الدكتور حاتم العيشي يهتم كثيرا بتثقيف مرضى الروماتيزم (اصطلاح مجازي يقصد به مرضى الامراض الروماتيزمية) ويدير عيادة روماتيزم بالقاهرة وايضا يقدم اسشارات طبية اون لاين من خلال موقع طبيبكم والذي يقدم، بالاضافة لخدمة استشارات طبية في مجال الروماتيزم، استشارات طبية في مجالات طبية اخرى عديدة على ايدي مجموعة من الاطباء الاستشاريين في مصر وكندا والولايات المتحدة
----------------------------
اذا كنت ترغب في الحصول على روابط المحاضرات الجديدة لدكتور حاتم العيشي عن الامراض الروماتيزمية على الواتس اب، برجاء الضغط على هذا الرابط
----------------------------
للاطلاع على مكتبة الفيديو الخاصة بفيدوهات د. حاتم العيشي على اليوتيوب للمرضى، برجاء الضغط على هذا الرابط
----------------------------
لمشاهدة فيديوهات د. حاتم العيشي للمرضى باللغة العربية، برجاء التوجه لقناته على هذا الرابط
----------------------------
اذا كنت تود الحصول على استشارة اون لاين فيديو مع د. حاتم العيشي، برجاء الضغط على هذا الرابط