الفيتامينات: مرضى كتير مغرمين بعالم الفيتامينات..
في الحقيقة مفيش فيتامينات نعرفها بتحسن نشاط المرض.
مفيش أي وجهة نظر اننا نوصف فيتامين ب ود وهـ وكاف أو المواد اللي زي سيلينيوم وزنك بهدف المساعدة في التحكم في أعراض المفاصل. ممكن توصف لأي اسباب اخرى زي وجود نقص في هذه الفيتامينات لكن توصيفها مش مفروض يكون بهدف التحكم في المرض.
الفيتامين د
يظل له دور فقط في المرضى اللي عندهم نقص في فيتامين د أو اللي بياخدوا كورتيزون كجزء من التوصيات اللي هدفها الحفاظ على العظام ووقايتها من هشاشة العظام وليس لأي هدف له علاقة بنشاط المرض وأعراض الإلتهاب بالمفاصل.
على فكرة نسبة مرضى الروماتويد المفصلي اللي بيكون عندهم نقص في فيتامين د بتكون نسبة مش قليلة ومعنى كده ان مرضى روماتويد مش قليلين هيكونوا محتاجين انهم ياخدوا فيتامين د فهلا. انما النقطة اللي الفيديو عنها واللي نجب نوضحها هنا هي إنه، بإستثناء وجود هذا النقص في فيتامين د، احنا منعرفلوش تأثير على نشاط المرض ان هو يقلله يعني ومش بنوصفه نوصفه بهذا الهدف. الفيتامين د بالذات محبوب ومشهور عالميا ومن أهم أسئلة المرضى دايما للأطباء.. هأحتاج آخد فيتامين د ولا لأ لعلاج المرض.
فيتامين د بجرعات عالية... كان ظهرت موضة كبيرة من حوالي خمستاشر سنة أو أكتر اسمها انك تتعالج بجرعات عالية جدا من الفيتامين دال، أعلى بكتير من الحرعات النمطية الموصوفة لعلاج نقص الفيتامين دال، والإقتراحات دي كانت بدأت غالبا لأن فيتامين د فعلا له فوايد كتيرة جدا بالجسم سواء للحفاظ على العظام او لتأثيراته على جهاز المناعة.. لكن الموضوع مكملتش كتير لأن طبيعي مع اقتراح مهم زي ده هيتعمل فيها ابحاث اكتر طبعا واللي من خلالها عرفنا إن الجرعات العالية لفيتامين دال، مع الوقت، ممكن يكون ليها تبعات ومشاكل اكتر حتى من نقص الفيتامين دال، ومفيش أطباء بتوصف الجرعات السوبر عالية دلوقتي لكن المرضى بيقروا عنها لسه كتير وممكن يتطوعوا ويعملوها طبعا من نفسهم فأحب أقولهم إفتكر إن نقص فتيامين د وزيادته في الجسم الإتنين حالات مرضية بس النقص مشاكله ومضاعفاته أقل وأرحم من الزيادة مع هذا الفيتامين. فيه حالة مرضية اسمها حالة زيادة الفيتامين دال في الجسم أو هايبرفيتامينوزز دي
حمض الفوليك
هو كمان لما بيتوصف فده بيكون مع أدوية معينة جدا وهي الميثوتريكسات والسلازوبيرين بهدف تقليل فرصة أي اعراض جانبية ممكن تيجي من تعاطيهم.
-------------------------
استخدام البروبيوتيكس
البروبيتوكس ايه هي؟ فاكرين لما كنا شرحنا في المقال الاول من هذه المقالات حاجة اسمها جراثيم الأمعاء وقولنا ان هذا العالم من جراثيم الأمعاء اللي عايشة في الأمعاء بتاعتنا فيه توازن معين فيها بين انواع سلالات مختلفة؟ لو حصل خلل وإضطراب معين لهذا العالم، وده فيه عوامل عديدة بتتحكم فيه ممكن الشخص يبقى أكثر عرضة لأمراض معينة مناعية او غير مناعية، ولو احنا استعدنا هذا التوازن لهذا العالم بتدخلات هنقولها دلوقتي المفروض نتوقع العكس: إن الشخص يعني يبقى أقل عرضة لهذه الأمراض. امتدت الفكرة بقى لتشمل كلام على امكانية اننا نشتغل على هذا العالم ايضا عشان مش بس نمنع مرض ممكن ييجي، لأ عشان نتحكم في نشاط مرض مناعي موجود بالفعل ونقلله: يعني نعمل حاجة تعيد نوع من التوازن بين سلالات جراثيم الأمعاء المختلفة عشان التوازن ده يقلل نشاط المرض اللي عندنا زي الروماتويد المفصلي طبعا مثلا. الحاجة دي بيقى اسمها إيه؟ منتجات إسمها بروبيوتيكس.
سلالات عديدة مختلفة اتعملت عليها ابحاث في السنين الأخيرة وبتتباع سواء في الصيدليات أو في مراكز بيع المكملات والطبيعة. نتايج الأبحاث مشكلتها لينا احنا جمعيات الأمراض الروماتيزمية انها متضاربة، ما بين اللي قالت ان تعاطي البروبيوتيكس مفيد لنشاط المرض واللي قالت إنه لم يثبت له فائدة أوي، وكمان مشكلته التانية ان انواع السلالات اللي استخدمت في الأبحاث المختلفة كانت غير موحدة. فكانت الخلاصة ان المراجعين لنتائج هذه الأبحاث بهدف خلق توصيات عامة منها لمرضى الروماتويد إنهم قالوا.. وقف.. محناش لاعبين دلوقتي.. احنا لازم نعمل دراسات اكتر وندرس الموضوع ده اكتر ونستعمل نفس انواع السلالات بالضبط في أبحاث جديدة على المرضى، ولو أثبتنا نتايج ايجابية ما عليهاش شك، يبقى ساعتها على اساس هذه النتايج، يتحط للبروبيوتكس معايير ومواصفات تحكم المنتجات اللي تتعمل وتتباع للمرضى خاصة وإن سوق البروبيوتيكس الحالي، زيه زي أي حاجة بتروج على إنها طبيعية وحلوة، سوق صار ضخم جدا وبتتحقق فيه مكاسب بالبلايين سنويا.
يبقى خلاصة الكلام في موضوع البروبيوتكس في التوصيات الروماتيزمية الحالية: احتمال هنبقى نوصفهم بثقة أكتر لما يكون عليهم دراسات وافية أكتر واستنتاجات واضحة أكتر. طيب لو مريض قالي انا باستعملها يا دكتور. أنا مش معترض. أنا بس بأفرقلك في هذه السلسلة بين اللي أنا هأتطوع وأقولك عليه واللي أنا هأستنى شوية لحد ما أوصفه في روشتة.
------------------------------
الأعشاب والبهارات
في كلام على شوية أنواع من الأعشاب أو الأكلات اللي ممكن تكون مفيدة في الأمراض الإلتهابية وبالفعل عليهم دراسات بتقترح فوايد ليهم ومنهم الزعفران والإرفة والتوم والجنزبيل والسمسم والرمان والكركم .. الدراسات اللي اتعملت، رغم انها كانت بتقترح فوايد لهذه المنتجات في حالات الإلتهاب مش قليلة، إلا إن عشان النتايج دي تتحول إلى توصيات نقولها لمرضى الروماتويد على الأخص، ينقصنا المزيد من الأبحاث على أعداد اكبر من المرضى.
------------------------------
قام بإعداد وتقديم هذه المعلومات الأستاذ الدكتور حاتم العيشي، استاذالامراض الروماتيزمية بكلية الطب بجامعة القاهرة واستشاري الروماتيزم بجمهورية مصر العربية والمملكة العربية السعودية
الدكتور حاتم العيشي يهتم كثيرا بتثقيف مرضى الروماتيزم (اصطلاح مجازي يقصد به مرضى الامراض الروماتيزمية) ويدير عيادة روماتيزم بالقاهرة وايضا يدير مركز يقدم استشارات طبية اون لاين والذي يقدم، بالاضافة لخدمة استشارات طبية في مجال الروماتيزم، استشارات طبية في مجالات طبية اخرى عديدة على ايدي مجموعة من الاطباء الاستشاريين في مصر وكندا والولايات المتحدة
----------------------------
اذا كنت ترغب في الحصول على روابط المحاضرات الجديدة لدكتور حاتم العيشي عن الامراض الروماتيزمية على الواتس اب، برجاء الضغط على هذا الرابط
----------------------------
للاطلاع على مكتبة الفيديو الخاصة بفيدوهات د. حاتم العيشي على اليوتيوب للمرضى، برجاء الضغط على هذا الرابط
----------------------------
لمشاهدة فيديوهات د. حاتم العيشي للمرضى باللغة العربية، برجاء التوجه لقناته على هذا الرابط
----------------------------
اذا كنت تود الحصول على استشارة اون لاين فيديو مع د. حاتم العيشي، برجاء الضغط على هذا الرابط