الم الروماتويد من اكتر الاعراض اللي بتسبب ازعاج للمريض، وكثير من المرضى يستغربوا لما يلاقوا نفسهم لسه حاسين بألم بالرغم من ان التحاليل كويسة ومفيش تورم ظاهر. وده لأنه ببساطة الالم في الروماتويد مش سببه الالتهاب بس. في الحقيقة في اربع اسباب مهمة جدا ممكن تزود الالم حتى مع تحسن الالتهاب

*السبب الاول هو حساسية الاعصاب حوالين المفصل. لو الالتهاب استمر شهور او سنين من غير علاج مناسب الاعصاب نفسها بتبقى حساسة واي حركة بسيطة تبقى مؤلمة

السبب التاني هو العوامل النفسية والجسدية زي القلق والتوتر وقلة النوم والاجهاد وكلها تؤثر على* احساس الالم بشكل كبير

*السبب التالت هو خشونة المفاصل اللي بتحصل في بعض المرضى اللي المرض عندهم بقاله سنين طويلة وادى لتآكل المفصل

*السبب الرابع هو الفيبروميالجيا اللي بتحصل في حوالي عشرين في المية من مرضى الروماتويد وتسبب الام عامة بالجسم واضطراب في النوم والمزاج.

المهم اننا نفهم السبب الحقيقي للالم عشان العلاج يكون مظبوط. مش كل الم معناه نزوّد علاج الروماتويد. الدكتور بيفرق بين الاسباب دي بالكشف والتحاليل واشعات زي الاشعة التليفزيونية. العلاج بيختلف حسب السبب: التهاب يتعالج بادوية الروماتويد اما حساسية الاعصاب فلها علاج مختلف، واذا كان السبب نفسي او فيبروميالجيا العلاج يكون بتغيير نمط الحياة وتحسين النوم وبعض الادوية الملطفة.

فهم الاسباب دي بيساعد المريض يعيش حياة افضل ويتحرك احسن وينام كويس حتى مع وجود المرض.