مرضى الروماتويد ومرضى الامراض الروماتيزمية المناعية بصفة عامة بحكم مرضهم المناعي بتكون ليهم ظروف خاصة بيهم لو كانوا هيعملوا عمليات جراحية، وبالتالي الطبيب بيحتاج يعمل احتياطات معينة ليهم في هذه الحالات.
ما هى الظروف الخاصة لمرضى الروماتويد اللي تميزهم عن باقي المرضى لو كان مقرر لهم اجراء عملية جراحية هي تلات حاجات:
..واحد: عندهم مرض مزمن
والمرض المزمن ده لو مكنش بيتعالج قبل كده بالأدوية المناسبة له وتسبب في تأثير سلبي على أجهزة في الجسم، زي مثلا المفاصل بالذات، بحيث ان مفصل ممكن يحتاج حتى عملية تغيير في وقت من الاوقات.
..اتنين: المرض ده مرض التهابي
يعني من الأمراض اللي بتعلي فيها علامات الإلتهاب في الدم، وأي مرض التهابي مزمن في الجسم ايا كان سببه، مناعي او غير مناعي، برضه لو متعالجش بأدوية مناسبة للشدة بتاعته، ممكن يكون تسبب في مضاعفات على المدى البعيد في الاوعية الدموية، يعمل مثلا تصلب شرايين اللي مشهور في المرضى اللي عندهم سكر أو ارتفاع ضعط دم وكوليسترول، والاحتمالية دي ليها معاملة خاصه لو هنعمل عملية.
..تلاتة: بيكونوا عرضة اكتر للإصابة بأمراض ميكروبية لسببين
إما بسبب مرض نشط مش تحت السيطرة ودي وزنها كبير أوي، وإما بسبب ادوية مثبطة لجهاز المناعة بتستخدم لتحجيم نشاط المرض المناعي
الان ما هى الاحتياطات الخاصة بهؤلاء المرضى لو كانوا هيعملوا جراحات؟
اربع انواع من الاحتياطات.
واحد: احتياطات لها علاقة بتأثر مفاصل معينة ممكن تعيق عملية التخدير
اتنين: احتياطات لها علاقة بإحتمالية وجود تصلب بالشرايين
ايه هي الاحتياطات؟
طبيب التخدير ممكن يطلب للمريض قبل العملية رسم قلب بالمجهود، عشان يتأكد ان مفيش مشكلة في الشرايين بتاعة القلب وبالتالي المريض يقدر يروح للتخدير والجراحة عادي.
مين مرضى الروماتويد بالذات اللي وارد هنطلبلهم الفحص ده؟ مش اي مريض روماتويد فقط اللي بيعانوا منمرض عنيف زيادة وفضل سنوات كتير مش تحت السيطرة واللي عندهم كمان عوامل او مؤشرات اضافية تفيد احتمالية اصابتهم بهذه المشكلة. وبالتالي عشان كل حاجة تمشي بسلاسة يفضل ان طبيب الروماتيزم من الأول يكون كاتب جواب لطببيب التخدير يصف به حاله المريض انه مصاب بالروماتويد والمرض كان نشط زيادة وده حصل لسنوات كتيرة وعنده عوامل معينة اضافية زي عنده السكر مثلا
وبالتالي هو حالة خاصة شوية عشان نبقى عيننا عليها اكتر شوية في جزئية الاوعية الدموية دي: يعني لما يكون طبيب التخدير على دراية بالموضوع ده من الأول من طبيب الروماتيزم أكيد هتفرق طبعا.
تلاتة: احتياطات لها علاقة بالوقاية من احتمالية حدوث اي جلطات في مرحلة ما بعد العملية، وده موضوع له توصيات عالمية حاليا من سنوات، واتباعها صار بيقلص فرصة المشكلة دي جدا
اربعة: احتياطات لها علاقة بالوقاية من اي امراض ميكروبية ممكن تحصل بسبب المرض الإلتهابي النشط أو بسبب العقاقير المستخدمة في علاجه
-----------------------------
قام بإعداد وتقديم هذه المعلومات الأستاذ الدكتور حاتم العيشي، استاذ الامراض الروماتيزمية بكلية الطب بجامعة القاهرة واستشاري الروماتيزم بجمهورية مصر العربية والمملكة العربية السعودية
الدكتور حاتم العيشي يهتم كثيرا بتثقيف مرضى الروماتيزم (اصطلاح مجازي يقصد به مرضى الامراض الروماتيزمية) ويدير عيادة روماتيزم بالقاهرة وايضا يقدم اسشارات طبية اون لاين من خلال موقع طبيبكم والذي يقدم، بالاضافة لخدمة استشارات طبية في مجال الروماتيزم، استشارات طبية في مجالات طبية اخرى عديدة على ايدي مجموعة من الاطباء الاستشاريين في مصر وكندا والولايات المتحدة
----------------------------
اذا كنت ترغب في الحصول على روابط المحاضرات الجديدة لدكتور حاتم العيشي عن الامراض الروماتيزمية على الواتس اب، برجاء الضغط على هذا الرابط
----------------------------
للاطلاع على مكتبة الفيديو الخاصة بفيدوهات د. حاتم العيشي على اليوتيوب للمرضى، برجاء الضغط على هذا الرابط
----------------------------
لمشاهدة فيديوهات د. حاتم العيشي للمرضى باللغة العربية، برجاء التوجه لقناته على هذا الرابط
----------------------------
اذا كنت تود الحصول على استشارة اون لاين فيديو مع د. حاتم العيشي، برجاء الضغط على هذا الرابط