العلاجات البيولوجية هي أحد أحدث العلاجات المستخدمة في علاج الأمراض الروماتيزمية المناعية على مدار التلاتين سنة الأخيرة. الفكرة العامة في أي علاج بيولوجي روماتيزمي هي استهداف مادة التهابية معينة بتلعب دور كبير في مرض ما بعقار معين بهدف تثبيطها وتلجيم نشاطها وبالتالي تلجيم نشاط المرض المناعي واخماده. العلاجات البيولوجية تنقسم إلى عائلات حسب إيه هو نوع المادة الإلتهابية اللي بتستهدفها كل عائلة فيهم. في المقال ده هنتكلم على عائلة جاك وهي من أحدث عائلات العقاقير اللي بتصنف مجازا على أنها عقاقير بيولوجية. أشهر أعضاء هذه العائلة اللي اجتازوا مراحل التجارب واللي متاحين فعلا حاليا لإستخدام المرضى هم تلات عقاقير: زيلجانز وأولوميانت ورينفوك..
مبدئيا كده قبل ما نشرح قصة جاك، احب اقولكم ايه هي الامراض الروماتيزمية اللي ممكن يستخدم الأطباء في علاجها العقاقير المثبطة لجاك.. الروماتويد المفصلي والتيبس الفقاري والتهاب المفاصل الصدفي والذئبة الحمراء وانواع من الامراض المناعية الروماتيزمية في الأطفال أيضا.
هنشرح قصة جاك في كلمتين بإختصار
عائلة جاك البيولوجية هي عائلة مثبطات جاك، ويطلع مين جاك؟ جاك ده يبقى بروتين موجود في خلايا الجسم بيستقبل اشارات تحفيزية للإلتهاب بتخليه يشرف على انتاج وافراز مواد التهابية مختلفة. منين بتيجي الاشارات التحفيزية؟ لما يكون في حالة التهابية في الجسم سواء ميكروب بيهاجم الجسم وده الاساس او لو فيه مرض مناعي في الجسم أيضا. لما الادوية من عائلة مثبطات جاك تعمل عملية تثبيط لهذا البروتين، اللي هو بورتين جاك، هيحصل تقليل للمواد الإلتهابية اللي كانت هتنتج عن تحفيز جاك. دي ببساطة قصة جاك.
في عندنا انواع مختلفة من بروتينات الجاك في جسمنا، مثلا جاك واحد وجاك اتنين وجاك تلاتة وغيرهم كمان، انتو عارفين الدكاترة دول ناس فاضيين غاويين يقعدوا يعملوا تقسيمات لكل حاجة في الجسم.. وكل جاك فيهم بينتج عن تحفيزه انواع مختلفة من المواد الإلتهابية.. تحفيز جاك واحد يطلع دول وتحفيز جاك اتنين يطلع دول وهكذا.. في نفس الوقت احنا عندنا ادوية مختلفة من عائلة جاك البيولوجية برضه، وكل دوا فيهم بيشتغل على جاك معين منهم إلى حد ما، وبالتالي هيثبط مواد التهابية معينة حسب الجاك اللي بيشتغل عليه. وبالتالي برضه، عشان احنا عارفين ايه المواد الإلتهابية المعينة اللي احنا عايزين نعمللها تثبيط في الامراض المناعية المختلفة، يبقى حسب المرض المناعي اللي احنا بنعالجه، بنختار نوع عقار الجاك المناسب لعلاج او للتعامل مع هذا المرض.
إيه الفرق بين عقاقير جاك وبين العقاقير البيولوجية المختلفة المعروفة الفرق إن العقاقير البيولوجية التانية كل واحد فيهم بيستهدف فقط مادة التهابية واحدة مش اكتر، لكن العقاقير من عائلة جاك بيستهدفوا مجموعة من المواد الإلتهابية المختلفة في وقت واحد لأنهم بيشتغلوا على مستوى المنبع، يعني على مستوى المصدر الأساسي اللي بينتج العديد من المواد الإلتهابية بعد كده.
بمناسبة ان عقاقير جاك عقاقير حديثة جدا بالنسبة للعقاقير الأخري، أحب اقولك نقطتين:
واحد: توصيف العلاجات البيولوجية للمرضى بيتبع نوع من اللايحة المقترحة من التوصيات العالمية ومش بيمشي بشكل عشوائي. يعني في مرض معين لو قررنا نوصف فيه علاج بيولوجي، فده مش معناه ان اي احدث علاج نجري نوصفه وخلاص.. ممكن نوصف علاج له عشرين سنة وأثبت كفاءة كبيرة وخبرتنا بيه كويسة جدا ونديه الأفضلية والأولوية. حسب اللايحة بتاعة التوصيف اللي احنا ماشيين بيها.
دي نقطة. النقطة التانية: بأؤكد عليك تاني بس بطريقة مختلفة إن الفيصل في توصيف العقاقير ليس ايه الجديد اللي نزل دايما ولكن ايه المناسب لمريض ما وده للمعلومية بيفرق كتير من مريض لآخر.. لسه ممكن علاج نزل من عشر سنين يكون هو انسب حاجة ليك.. يعني لو انت بتعاني من احد الامراض المناعية اللي انا لسه ذاكر اسمها دلوقتي واللي بياعلجها ادوية جاك، ولو انت ماشي على علاجاتك مع طبيبك وامورك ماشية كويس فالفيديو ده بالنسبة لك مش اكتر من معلومات عامة للتثقيف العام، ومش معناه ابدا انك تبدأ تفكر لا تسيب علاجك ولا تسيب طبيبك.. انت كده ماشي زي الفل وكمل زي مانتا لو سمحت.
الاسماء المختلفة للعقاقير من عائلة جاك مش قليلة..
اول واحد نزل فيهم اسمه التجاري زيلجانز وده موجود في معظم البلاد دلوقتي.
تاني واحد نزل بعد كده اسمه التجاري الأصلي اولوميانت
وله اسم تاني في مصر حاليا وهو باريتافا أقل من العقار الأصلي في السعر بكتير ونتايجه برضه كويسة جدا،
وظهر بعد كده عقار اسمه التجاري رينفوك موجود في السعودية والخليج من فترة وفي مصر بقى له أقل من سنة،
وفي عقاقير اخرى كمان إلا انها إما بلاد معينة جدا وليس كل البلاد، او بتستخدم في امراض جلدية في الاساس وليس امراض روماتيزمية، وبالتالي ان معرفش عنها كتير.. عموما صورهم كلهم على الشاشة برضه للعلم بالشىء.
ايه اللي بنعمله لما نقرر اننا نوصف عقار من عائلة جاك لمريض يعاني من مرض روماتيزمي مناعي؟
غير اننا بنعمل فحوص الدم اللي بنعملها لما نيجي نبدأ أي علاج بيولوجي، بناخد تاريخ مرضى من المريض بندور فيه على الحالات اللي تحتاج احتياطات زيادة او اللي بتعمل علينا قيود زيادة لما نوصف ادوية جاك. نقصد إيه هنا؟
في المرضى اللي بنعتبرهم أكثر عرضة لأمراض الاوعية الدموية القلبية بالذات، وفي المرضى المدخنين بنكون اكثر حرصا لما بنوصف هذه العقاقير وبنوزن الفوائد اللي هنحصل عليها قصاد الأعراض الجانبية المحتملة، ونفس الشىء بنعمله في المرضى اللي عندهم تاريخ مرضى في العائلة لأمراض سرطانية. ولو لازم يتم توصيف عقار من عائلة جاك لهؤلاء المرضى فبتكون في هذه الحالة الأفضلية لعقار الزيلجانز على الأخص دونا عن باقي أفراد العائلة لإرتباطه الأقل نسبيا بمثل هذه المضاعفات.
طيب وإيه الاحتياطات اللي بنتأكد منها لما نوصف الروشتة اللي فيها احد ادوية جاك؟
بنؤكد على السيدات الإلتزام بإستخدام وسيلة لمنع الحمل اثناء العلاج بأدوية جاك.
لو المريض بيعاني من أي التهاب ميكروبي، ضروري هذا المرض الميكروبي يتم علاجه تماما قبل ما نبدأ على علاج جاك.
مش بنوصف اي عقار من عقاقير جاك مع عقار بيولوجي آخر لأن ده ممكن يعمل تثبيط شديد للمناعة ويتسبب في مضاعفات.
المرضى اللي فوق سن خمسة وستين سنة، لو هنوصفلهم احد عقاقير جاك برضه بتكون الافضلية لعقار زيلجانز على الأخص دونا عن باقي افراد العائلة.
الأعراض الجانبية الأكثر شيوعا للعقاقير من عائلة جاك غير خطيرة وهي التهابات ميكروبية عابرة وغير خطيرة وغثيان وصداع ويمكن اسهال.
المضاعفات الاكثر ازعاجا ومعظمها متعلق بإلتهابات ميكروبية بتحصل في نسبة اقل من المرضى واشهرها التهاب فيروسي اسمه الحزام الناري او بالإنجليزي اسمه هيربس زوستر.
آخر نقطة.. المتابعات الدورية للمرضى اللي بيتعاطوا عقاقير جاك بتكون كل شهر الى تلات شهور بالتقريب وتعتمد على المريض بقى له على العقار أد ايه.. كل ما بيكون لينا فترة على العلاج وبناخد الأمان ان مفيش منه مشاكل كل ما بتزيد فترات المتابعات الدورية.
------------------------------
قام بإعداد وتقديم هذه المعلومات الأستاذ الدكتور حاتم العيشي، استاذ الامراض الروماتيزمية بكلية الطب بجامعة القاهرة واستشاري الروماتيزم بجمهورية مصر العربية والمملكة العربية السعودية
الدكتور حاتم العيشي يهتم كثيرا بتثقيف مرضى الروماتيزم (اصطلاح مجازي يقصد به مرضى الامراض الروماتيزمية) ويدير عيادة روماتيزم بالقاهرة وايضا يدير مركز يقدم استشارات طبية اون لاين والذي يقدم، بالاضافة لخدمة استشارات طبية في مجال الروماتيزم، استشارات طبية في مجالات طبية اخرى عديدة على ايدي مجموعة من الاطباء الاستشاريين في مصر وكندا والولايات المتحدة
----------------------------
اذا كنت ترغب في الحصول على روابط المحاضرات الجديدة لدكتور حاتم العيشي عن الامراض الروماتيزمية على الواتس اب، برجاء الضغط على هذا الرابط
----------------------------
للاطلاع على مكتبة الفيديو الخاصة بفيدوهات د. حاتم العيشي على اليوتيوب للمرضى، برجاء الضغط على هذا الرابط
----------------------------
لمشاهدة فيديوهات د. حاتم العيشي للمرضى باللغة العربية، برجاء التوجه لقناته على هذا الرابط
----------------------------
اذا كنت تود الحصول على استشارة اون لاين فيديو مع د. حاتم العيشي، برجاء الضغط على هذا الرابط