أهم الأطعمة أو المكملات أو العناصر الغذائية أوالحميات اللي بنوصي بيها لأن الأبحاث فعلا بتنصح المرضى إنهم يتناولوها هي بصفة عامة تلات حاجات فقط
أولا المكملات الغذائية:
لما نتكلم على مكملات غذائية يوصى بيها في مرضى الروماتويد، يبقى الكلام هيكون في الاساس على عائلة الأوميجا تلاتة.. هو فيه أنواع من الأوميجا .. لكن أوميجا تلاتة، بالتحديد أوميجا تلاتة اللي بنحصل عليه من الاسماك هي اللي عليها كل الأبحاث الإيجابية وهي محل كل التزكية بتاعتنا.
الجرعة اللي المفروض نستخدمها: على الأقل 2 جرام يوميا، يعني واحد جرام بعد الفطار وواحد جرام بعد العشاء.
فوايد الأوميجا تلاتة حاجتين:
أولا: بتساعد على تحسين الأعراض في مرضى الروماتويد المفصلي ومرضى الأمراض المناعية الأخرى.
إتنين: ليها كمان فايدة تانية وهي انها بتمنع المضاعفات اللي ممكن تحصل في الأوعية الدموية من حالة الإلتهاب المزمن في الجسم.
مدة كورس العلاج: مبدئيا كده تلات شهور مش أقل.. تلات شهور هي أقل مدة ممكن يكون ليها تأثير على نشاط المرض، تأثير يكون ملموس فعلا للمريض.
بالإضافة إلى تعاطي مكملات الأوميجا تلاتة، يوصى أيضا إن المريض يزود من أنواع الطعام اللي بيكون فيها الأوميجا تلاتة .. يعني يزود من أكل الأسماك.
يوجد ايضا مضادات الأكسدة سواء أكلات معينة أو مكملات ودي نقدر نقول إن ليها دور ايجابي لصحتك بصفة عامة خصوصا لو كنت عايش في بلد الهواء فيه تلوث وليها فايدة كمان لمرضى الروماتويد لأنها بتساعد بدور ليها مضاد للإلتهاب أيضا. مضادات الأكسدة مصادرها الطبيعية اغلبها أكلات ملونة: كل ما هو ملون فيه مضادات أكسدة زي الفراولة والتفاح والبرقوق الاسود والقراصية والفلفل الاحمر والاصفر والخرشوف والعنب الاسود والاحمر والفاصوليا الحمرا والكرانبيري والتوت الاسود والأزرق.
ثانيا: منتجات الألبان:
فيه إعتقاد شائع جدا عند الكثير من العامة وعند المرضى ان منتجات الألبان مضرة، إعتقاد إكتسبوه من السوشيال ميديا على مدار سنوات وسنوات أو من أشخاص غير مختصين..
الحقيقة لم يثبت بالدليل العلمي ان منتجات الألبان مضرة لمرضى الروماتويد المفصلي. بتلعكس هي مفيدة. للاسف بالفعل فيه ناس كتير فعلا بتتبع تقييد كبير جدا لمنتجات الالبان في نظامها الغذائي من نفسها او بسبب توصيات وتحذيرات كتير على الإنترنت. مفيش كمان على فكرة أساس للعرف اللي بيروج فكرة إن أمعاء مرضى الروماتويد بيكون عندها تحسس لمنتجات الألبان أو للبن البقري بالذات.
نحب نوضح إن فيه مرضى عندهم حاجة إسمها حساسية لاكتوز.. ده موضوع تاني وملوش علاقة بالروماتويد.. الناس دول منتجان الألبان بتتعبهم فعلا.. دي حالة خاصة جدا.. سوء تفاهم بين امعاء هذا الشخص بالذات ومنتجات الألبان ومش مفروض يصدر عنه تعميم بمنع الألبان ومنتجاتها لكل الناس التانية أو أي مرضى تانية.
يبقى لا ينبغي توصية المرضى بمنع منتجات الألبان في نظامهم الغذائي.
أهم فوائد منتجات الألبان؟
واحد:
منتجات الألبان هي المصدر رقم واحد لعنصر الكالسيوم في النظام الغذائي. والكالسيوم أهميته في مرضى الروماتويد إنه بيشكل وقاية لمرض هشاشة العظام اللي هو أحد المضاعفات الواردة لهذا المرض.
إتنين:
تناول منتجات الألبان بكميات أعلى بيساعد جدا على الوقاية من كسر عظمة الفخد في المرضى اللي أصيبوا فعلا بهشاشة عظام: بيقللها بنسبة تلاتاشر في المية. التأثير ده بالذات بيكون أكتر لما بنتعاطي منتجات الألبان المخمرة اللي هي الزبادي والأجبان وليس اللبن نفسه.
تلاتة:
برضه منتجات الألبان المخمرة اللي هي الزبادي والأجبان أيضا ليها تأثيرات ايجابية على الجهاز الدوري وعلى الأوعية الدموية. بيقلل مضاعفات الأوعية الدموية بنسبة اربعة في المية وبيقلل فرصة الإصابة بمرض السكري، النوع التاني بنسبة سبعة وعشرين في المية.
ثالثا حمية البحر الأبيض المتوسط:
حمية البحر الأبيض المتوسط بتمثل النمط الغذائي الشائع لدول حوض البحر الأبيض المتوسط، بالتحديد في اليونان وإيطاليا وفرنسا وإسبانيا والمغرب. والنظام ده بيحتوي على نسبة عالية من زيت الزيتون، بالتحديد زيت الزيتون البكر، والبقوليات والحبوب الكاملة، والمكسرات والفواكه، والخضروات، والبطاطس وكمان الأسماك ومنتجات الألبان بالذات الزبادي والأجبان، بالإضافة إلى نسبة منخفضة من اللحوم ومنتجاتها. مفيش في هذه الحمية الأغذية المصنعة والحبوب المكررة ومفيش فيه إسراف خالص في إضافة السكريات للطعام.
الفرق بين الحبوب الكاملة اللي في هذه الحمية والحبوب المكررة اللي مستبعدة من هذه الحمية
والفرق بين زيت الزيتون البكر وزيت الزيتون العادي.
الحبوب الكاملة اصطلاح بيقصد بيه إن الحبوب هنا كاملة المكونات يعني تحتوى على تلات أجزاء.. الجزء الأول إسمه الجنين بتاع الحبة اللي اسمه بالإنجليزي الجيرم واللي بيحتوى على دهون صحية وعلى فيتامينات ومضادات أكسدة. الجزء التاني هو القشرة الخارجية اللي اسمها بالإنجليزي البران وفيها فيتامينات كتير برضه لكن مضغها مش أسهل حاجة في الأكل. الجزء التالت اسمه الإندوسبيرم وده بيحتوى على نشويات وبروتينات وبعض الفيتامينات. كل جزء من التلاتة مفيد لجسمنا بطريقة مختلفة.
عملية التكرير او بمعنى أصح الطحن اللي بيتعمل في المطاحن للحبوب الكاملة واللي بيخليها حبوب مكررة أو ريفيند جرينز عملية بتجرد الحبوب من جزء الجنين اللي بيحتوى على دهون ممكن تقصر عمره لو كان هيتخزن عشان يتباع بعدين، وكمان بتجرد الحبوب من جزء البران اللي هو القشرة الخارجية وبتسيب فقط الإندوسبيرم اللي هو سهل جدا في المضغ والهضم ده.
بالتالي المنتج النهائي بعد عملية الطحن اللي هو الحبوب المكررة أو الريفايند جرينز بيكون منتج أقل شويتين في القيمة الغذائية بتاعته من المنتج الاصلي اللي هو الحبوب الكاملة او الهول جرينز.
بالنسبة للفرق بين زيت الزيتون البكر وزيت الزيتون العادي: زيت الزيتون البكر فيما يخص الفوايد بتاعته بيحتوي على نسبة أعلى من مضادات الأكسدة ودي ليها تأثير مضاد للإلتهاب وكمان بيحتوي على نسبة أقل من زيت اسمه زيت الأولييك اللي هو موجود بنسب أعلى في زيت الزيتون العادي واللي مش بيتعبر حاجة صحية أوي وتقليله أفضل من وجوده في نظامنا الغذائي.
بصفة عامة، يوصى جدا إن المرضى يتبعوا حمية البحر الأبيض المتوسط لأنه ثبت إن لها تأثير إيجابي على أعراض التهاب المفاصل وكمان لها تأثير وقائي من أمراض الأوعية الدموية أيضا اللي ممكن تحصل مع الإلتهاب المزمن.
------------------------------
قام بإعداد وتقديم هذه المعلومات الأستاذ الدكتور حاتم العيشي، استاذ الامراض الروماتيزمية بكلية الطب بجامعة القاهرة واستشاري الروماتيزم بجمهورية مصر العربية والمملكة العربية السعودية
الدكتور حاتم العيشي يهتم كثيرا بتثقيف مرضى الروماتيزم (اصطلاح مجازي يقصد به مرضى الامراض الروماتيزمية) ويدير عيادة روماتيزم بالقاهرة وايضا يدير مركز يقدم استشارات طبية اون لاين والذي يقدم، بالاضافة لخدمة استشارات طبية في مجال الروماتيزم، استشارات طبية في مجالات طبية اخرى عديدة على ايدي مجموعة من الاطباء الاستشاريين في مصر وكندا والولايات المتحدة
----------------------------
اذا كنت ترغب في الحصول على روابط المحاضرات الجديدة لدكتور حاتم العيشي عن الامراض الروماتيزمية على الواتس اب، برجاء الضغط على هذا الرابط
----------------------------
للاطلاع على مكتبة الفيديو الخاصة بفيدوهات د. حاتم العيشي على اليوتيوب للمرضى، برجاء الضغط على هذا الرابط
----------------------------
لمشاهدة فيديوهات د. حاتم العيشي للمرضى باللغة العربية، برجاء التوجه لقناته على هذا الرابط
----------------------------
اذا كنت تود الحصول على استشارة اون لاين فيديو مع د. حاتم العيشي، برجاء الضغط على هذا الرابط