تحليل الــــ ANA 

تحليل الــــ ANA  تحليل معروف عند المرضى اللى بيشتكوا  من آلام بالمفاصل أو أعراض روماتيزمية اخرى، و الاعراض دى تطلبت اجراء بعض التحاليل اللي بيطلبها طبيب الروماتيزم علشان يقدر يشخص الامراض الروماتيزمية المناعية، واللي بيكون من ضمنها تحليل الــــ ANA 

هنتكلم فى المقال ده عن تحليل الــــ ANA  .. وأهميته مش بس في إننا نعرف المعلومات الاساسية العلمية عنه، 

لأ كمان في اننا نلفت انتباهك للمعلومات الخاطئة الشائعة ايضا عنه خاصة وإن فيه فرق كبير جدا في ترجمة نتيجة هذا التحليل بين اطباء الامراض الروماتيزمية المتخصص وبين الغير متخصصين .

ازاي  الطبيب بيترجم نتيجة تحليل الــــ ANA  ؟

ازاي التحليل الايجابي ممكن يفيدني في عملية التشخيص بطرق اكتر من مجرد ايجابيته

ان التحليل ده لا يسمى تحليل الذئبة

 تحليل الــــ ANA   اهميته الكبيرة في الطب انه بيطلع ايجابي بنسبة مرتفعة، في عدد من الامراض الروماتيزمية المناعية زي الذئبة الحمراء والمختلط والتهاب العضلات المناعي وتصلب الجلد والروماتويد ، وكمان مرض شوغرن وامراض أو حالات روماتيزمية اخرى سواء في الكبار او في الاطفال زي نوع معين جدا من انواع روماتويد الاطفال، فطبيعي انه لو طبيب الروماتيزم شاف مريض بيشكو من اعراض تقترح اي واحد من هذه الامراض، انه يطلب هذا التحليل من ضمن التحاليل اللي وارد يطلبها للمريض، لأن ده هيساعده في عملية التشخيص. مقولتش ان هو ده اللي هيعمل التشخيص ويؤكده. قولت عشان هيساعده في عملية التشخيص، والجملة دي مهمة لأن التحليل ده حتى ممكن يطلع سلبي في احد الامراض اللي انا ذكرتها ولسه التشخيص برضه يتعمل. افتكر دايما ان مدير تشخيص الامراض هو الطبيب وليس التحاليل زي ما مرضى كتير فاهمين للاسف. يبقى كده لحد دلوقتي عرفنا ليه الطبيب ممكن يطلب هذا التحليل لمريض ما.

لو كان التحليل ايجابي بنسبة مرتفعة، فطبيب الروماتيزم اللي طلب التحليل طبعا لسبب وجيه اصلا، هيضعه في الاعتبار طبعا، ووارد يستعمله مع علامات تانية عشان يبني تشخيص مرض روماتيزمي معين في مريض ما. بالمناسبة انواع العلامات المختلفة اللي بنشخص بيها الامراض هي تلاتة: اعراض المريض والكشف على المريض وتحاليل المريض. انت قولت يا دكتور عشان يبنى تشخيص مرض، تقصد إيه يبني تشخيص؟ ماهو اصل امراض كتيرة ومنها الامراض المناعية الروماتيزمية بتتشخص بناء على استيفاء المريض لحد ادنى من علامات اجتمعت مع بعضها. ففي هذه الحالة ايجابية تحليل الإي إن إيه ده هيبقى بمثابة طوبة بنضيفها لعلامات تانية حصلنا عليها وبنستخدمها واحنا بنبني التشخيص بتاع المريض ده.

لو كان التحليل ايجابي بنسبة ايجابية ضعيفة، ممكن نقرر ان نتيجة التحليل تهمنا برضه لأن المريض فعلا عنده اعراض وعلامات تقترح احد الامراض الروماتيزمية اللي بيكون فيها هذا التحليل ايجابي، فنعطيه وزن برضه وناخد بإيجابيته هنا، و ممكن نعيدالتحليل بعد شهور او سنة لو احتاجنا لتوثيق ايجابيته في امراض معينة.

للمعلومية هنا، التحليل الايجابي بنسبة ايجابية ضعيفة، ده له اسباب اخرى كمان غير الامراض الروماتيزمية المناعية زي على سبيل المثال انه بيطلع ايجابي في بعض الامراض الميكروبية، الفيروسية بالذات، وكمان بيطلع ايجابي في نسبة خمسة الى عشرة في الميه من الناس اللي ماشيين في الشارع اللي معندهمش اي امراض اصلا، والمعلومة دي مهمة للمرضى اللي بيعملوا تحاليل احيانا بشكل عشوائي وخلاص، سواء هما طلبوها لنفسهم او طبيب غير مختص طلبها ليهم، من غير اي اعراض تقترح اي مرض مناعي ويطلعلهم تحليل زي ده ايجابي ويلفوا بيه على الدكاترة محتارين او يتشخصوا تشخيصات غريبة من غير اساس.  

التحليل اللي بتطلع نتيجته ايجابية بيكون ملحق معاه نتيجة تانية اسمها نمط النتيجة الايجابية، والنمط ده حسب نوعه، بيكون بمثابة علامة معملية بتقول ان الاجسام المضادة اللي ضد منتجات النواه اللي في المريض ده من النوع اللي متوجهة ضد منتجات النواه اللي في جدار الخلية بالتحديد، ولا منتجات النواه اللي عايمة في السيتوبلازم بتاع الخلية بالتحديد، ولا منتجات النواه اللي مقرها داخل النواه نفسها بالتحديد. وده يفيدني في إيه؟

لو فرضنا مثلا ان عندي النمط اللي بيفيد ان الاجسام المضادة هنا متوجهة ضد منتجات النواه اللي في جدار الخلية، نمط بنسميه ريم باترن، وإحنا عارفين ان المنتج بتاع النواه اللي في جدار الخلية اسمه كذا بالتحديد، اسمه منتج الدي إن إيه، نروح ساعتها طالبين من المعمل التحليل الاضافي الجديد اللي اسمه فحص الاجسام المضادة ضد الدي إن إيه بالتحديد، ولما يطلع ايجابي، وغالبا هيطلع ايجابي هنا في الناس اللي عندهم النمط ده بالذات، يبقى انا كده عندي علامة جديدة اضافية وكمان مهمة جدا بأبني بيها تشخيص مرض مناعي معين في هذا المريض أو بأعمل تأكيد أكتر لهذا التشخيص. أصل خطوة اني احدد الاجسام المضادة اللي ضد منتجات النواه  اللي في المريض ده ضد اي منتج من منتجات النواه بالتحديد أقوى بكتير في دلالتها وفي قدرتها على تشخيص مرض بعينه من اني اقول ان هو عنده اجسام مضادة ضد احد منتجات النواه وخلاص من غير ما احدد المنتج ده.

بمعنى آخر، تحليل الــــ ANA   ده نقدر نعتبر ايجابيته افادتها في تشخيص الامراض المناعية الروماتيزمية افادة عامة، يعني ايجابيته بتفتح الباب بتاع الأمراض اللي الجسم بيعمل فيها اجسام مضادة ضد منتجات النواه بصفة عامة، من غير ما تحدد انهي واحد من منتجات النواه بالضبط او بالذات هو اللي اتعملت الاجسام المضادة ضده والتشخيصات المحددة عادة بتكون مربوطة بتحاليل بتاعة أجسام مضادة ضد منتجات معينة جدا من منتجات نواة الخلية.

نمط ايجابية التحليل بقى هو اللي بيقترح عليا نوع الفحص المحدد جدا بتاع الاجسام المضادة اللي اطلبه من المعمل واللي يخليني اعرف بالذات ايه هو المنتج من منتجات النواه اللي الاجسام المضادة اتعملت ضده، وده بيقدر يحددلي تشخيص بعينه في بعض الامراض الروماتيزمية المناعية.

النقطة الرابعة:

 التحليل ده ما اسموش تحليل الذئبة .

تحليل ANA زي ماشرحنا فى السابق، له اسباب وجيهة نطلبه عشانها، وله طريقة علمية نترجمه على اساسها.

التحليل ده ما اسموش تحليل الذئبة زي ما بعض المرضى ما بيسموه. ممكن يطلع ايجابي في مرض الذئبة الحمرا زي ما وضحنا، وكمان ممن يطلع ايجابي في امراض تانية كتيرة. وبالتالي ارجوك، لو التحليل ده طلع عندك ايجابي، خصوصا لو كان اللي طلبه منك شخص غير متخصص في الامراض الروماتيزمية، وقالك ان تحليل الذئبة عندك طلع ايجابي، فده معناه انه غير ملم بالمرة بأي حاجة من اللي احنا شرحناها هنا في هذ المقال عن هذا التحليل وامتى بنطلبه وليه بنطلبه وازاي بنترجم نتيجته..

------------------------------

قام بإعداد وتقديم هذه المعلومات الأستاذ الدكتور حاتم العيشي، استاذ  الامراض الروماتيزمية بكلية الطب بجامعة القاهرة واستشاري الروماتيزم بجمهورية مصر العربية والمملكة العربية السعودية

الدكتور حاتم العيشي يهتم كثيرا بتثقيف مرضى الروماتيزم (اصطلاح مجازي يقصد به مرضى الامراض الروماتيزمية) ويدير عيادة روماتيزم بالقاهرة وايضا يدير مركز يقدم استشارات طبية اون لاين والذي يقدم، بالاضافة لخدمة استشارات طبية في مجال الروماتيزم، استشارات طبية في مجالات طبية اخرى عديدة على ايدي مجموعة من الاطباء الاستشاريين في مصر وكندا والولايات المتحدة

----------------------------

اذا كنت ترغب في الحصول على روابط المحاضرات الجديدة لدكتور حاتم العيشي عن الامراض الروماتيزمية على الواتس اب، برجاء الضغط على هذا الرابط 

----------------------------

للاطلاع على مكتبة الفيديو الخاصة بفيدوهات د. حاتم العيشي على اليوتيوب للمرضى، برجاء الضغط على هذا الرابط

----------------------------

لمشاهدة فيديوهات د. حاتم العيشي للمرضى باللغة العربية، برجاء التوجه لقناته على هذا الرابط

----------------------------

اذا كنت تود الحصول على استشارة اون لاين فيديو مع د. حاتم العيشي، برجاء الضغط على هذا الرابط